جمالك بالألوان مع جيلان.. عدد خاص لكل العرايس

 

أيام قليلة ونحتفل بعيد الفطر المبارك، أعاده الله علينا وعلى الأمة الإسلامية بالصحة والخير.. وطبعاً الأفراح والمناسبات بتكتر في موسم الأعياد والإجازات، وكل عروسة بتحلم في اليوم ده إنها تكون ملكة مُتوّجة، وبتفكّر إزاي شكلها يكون حلو ومميز جداً..

علشان كده فكّرت إني أقدِّم لكم النهارده عدد خاص بالعروسة؛ هنتكلّم فيه عن الألوان الموضة في الميك أب، وهنشوف تصميمات مختلفة لفساتين الأفراح، وكمان هنشوف ربطات تلفة..طرح مختلفة

• نصيحة للعرايس.. بلاش تجري وراء الموضة

أكيد موضة الميك أب بتختلف من موسم لموسم، لكن أنا عايزة أنصح كل العرايس بلاش تجروا ورا الموضة؛ لأنك لو مشيتي على موضة أو استايل معين، بعد مدة هتلاقي إن استايلك في الصور غريب ومش على الموضة.

علشان كده الأفضل إنك تختاري الألوان اللي ما بتبطلش أو بيكون لها موضة معينة، يعني دايماً خليكِ في الألوان الكلاسيكية في الميك أب؛ زي: الروز والموف والبني بدرجاتهم والأوكسيديه والذهبي والأسود والرمادي والنبيتي.

ويا ريت تبعدي عن درجات الأزرق والأخضر؛ لأن الألوان دي مش بتليق على بشرتنا، لكن ممكن تحطّي كحلي أو زيتي.

وحاولي على أد ما تقدري يوم فرحك إن شكلك يكون بسيط، والميك أب بتاعك يبقى هادي وشيك.

• ماكياج العيون.. مهم للعروسة المحجبة

طبعاً فيما يخص ميك أب العروسة المحجبة، بنحب نركّز أكتر على ماكياج العيون؛ لأنها أكتر حاجة بتظهِر الوش.

والسنة دي الموضة في الميك أب هي الألوان الفاتحة في الآي شادو، ويكونوا أكتر من لون وبندمجهم مع بعض، ومعاهم آي لاينر ورموش، ونحط خط آي شادو من تحت العين.

وبالنسبة لأحمر الشفاه، فاخترته باللون الروز، وعلشان اللون يثبت معانا فأنا مليت شفايف الموديل كلها بقلم التحديد، وبعد كده حطيت أحمر الشفاه، وفي الآخر حطيت ملمع الشفايف.

وزي ما هنشوف في الفيديو أنا عملت للموديل ميك أب العيون بدرجات الموف والروز، مع إضافة الرموش الصناعية، وطبعاً دلوقتي بقى فيه أطوال وكثافات وأنواع مختلفة من الرموش.

أما بالنسبة لكريم الأساس، فطبعاً اخترت الدرجة المناسبة مع لون بشرة الموديل، مع تحديد الوش بتوزيع كريم الأساس الغامق مع الفاتح بطريقة معينة، وبعد كده حطيت أحمر خدود باللون الروز، وحطيت جزء بيلمع على منطقة الأنف والخدود.

إضغط لمشاهدة الفيديو: 

• التاج والإكسسوار.. موضة في طرحة العروسة المحجبة

دلوقتي هنشوف مع بعض إزاي ممكن نعمل ربطة طرحة مناسبة مع الوش الطويل والرفيع، وزي ما هنشوف أنا عملت للموديل ربطة بالتول منفوشة شوية علشان تدي لوشها امتلاء، وحطيت عليها من قدام إكسسوار عبارة عن عقد ألماظ نازل منه فصوص وفيه وردة، ونازل من النصف دور من السلاسل على شكل دوران، وطبعاً ده مناسب مع الوش الطويل؛ لأنك لو لبستي إكسسوار نازل بالطول هيطوّل وشك أكتر.

وبعد ما ربطت الطرحة الأولى، هجيب طرحة تول تانية طويلة وهثبّتها كويس جداً، وبعد كده هثبّت عليها طرحة تانية قصيرة مطرّزة بفصوص قريبة من شكل التطريز اللي على الفستان.

فيه عرايس كتير بتخاف من الطرحة الطويلة إنها تداري على الفستان، لكن ما تخافيش خالص؛ لأن الطرحة الطويلة موضة جداً، وكمان التول شفاف، وبالتالي هيبيّن اللي تحته.

ده غير إن الطرحة الطويلة بتدّي طول وبتخلي شكل الجسم أرفع، وكمان لو وشك مليان يا ريت تبعدي عن الطرحة القصيرة والمنفوشة؛ لأن شكلها مش هيبقى لطيف.

• الكورساج مناسب مع العروسة الطويلة

بالنسبة لشكل الفستان اللي الموديل لابساه، فهو عبارة عن 3 قطع بادي، وعليه الكورساج وجيب.

والفستان ده طبعاً هيبقى مناسب أكتر مع العروسة الطويلة، أو لو واحدة مليانة من الجزء اللي فوق هيخلّيها تبان أرفع؛ لأن الكورساج نازل بالطول، والجيب قَصّتها زي قَصة السمكة اللي بتكون ضيّقة من فوق ونازلة على واسع من تحت.

وقماش الفستان من تحت عليه رسوم بالسيلفر وفصوص بسيطة أوي متوزّعة عليه، أما البادي والكورساج عليهم شغل وتطريز أكتر، والفستان زي ما هنشوفه شكله رقيق وناعم، وكمان مش هيضايق العروسة في الحركة؛ لأن الديل بتاعه مش طويل أوي، وكمان الفستان نفسه خفيف.

وطبعاً أنا عارفة إن معظم البنات بتحب إنها تلبس فستان عليه تطريز كتير في خطوبتها أو في فرحها؛ علشان مع الإضاءة يبقى شكلها ظاهر، دي وجهة نظر مش باعترض عليها، لكن أنا بافضّل البساطة، وإن خطوط الفستان تبقى انسيابية أكتر زي ما بنشوف في الموديلات الأوروبية.

إضغط لمشاهدة الفيديو: 

• الكروشيه موضة في طرحة العروسة

دلوقتي هنشوف شكل جديد للطرحة، استخدمنا فيه الكروشيه المشغول، والشكل ده جديد وغير مكرر، وممكن نستخدمه بإننا نحطه كباندانا.

وعلشان أنا مستخدمة الكروشيه فيه فصوص، فحبيت إن الطرحة من ورا تبقى سادة، ومنفوشة علشان تدي دوران للوش، وبكده تبقى الطرحة أبسط وأسهل في الحركة، وتبقى العروسة حرّة وقادرة تتحرّك بشكل أحسن.

الطرحة بقى من ورا عبارة عن طبقتين من التول السادة؛ لأن أنا حبيت إن الشغل كله يكون على الجزء الأمامي من الطرحة، علشان الطرحة ما تبقاش تقيلة أوي على العروسة.

والربطة دي ميزتها إن الإكسسوار عليها من كل ناحية؛ لأن فيه عرايس بيقابلها مشكلة مع التصوير إن الشغل اللي على الطرحة بيكون على ناحية واحدة بس، والربطة دي بتليق لو لابسة بادي سادة، ومش لابسة أي إكسسوارات من فوق.

إضغط لمشاهدة الفيديو: 

• الأورجانزا والتول.. لفستان فرح مُميز

في الفستان ده التطريز على الكورساج بس، والجيب عليها تطريز خفيف، والبادي مطرّز من على الياقة ومن على الكم..

وهنلاقي إن الكورساج من فوق فيه درابيه، بيدي امتلاء للبنت الرفيعة من فوق، أما بقى طريقة توزيع الإستراس الموجود في الكورساج بالجنب بتدي شكل أنحف لمنطقة الوسط.

أما بالنسبة للجيب فهي ملمومة كلها بأبليكة ونازلة بفولونات وكرانيش، والقماش الفستان ده عبارة عن أورجانزا وتول، والقماش ده بيدي شكل حلو ومبهج جداً للعروسة.

وهنلاقي إن التطريز على الجيب مش كتير أوي؛ يعني مجرد حاجة بسيطة على الذيل، وده بيدي للعروسة حرية أكتر في الحركة؛ لأن التطريز الكتير بيتقل الفستان.

وميزة الموديل ده إنه بيداري امتلاء الجسم من تحت؛ لأنه مقسوم لقطعتين.

إضغط لمشاهدة الفيديو: 

• طرحة عروسة بشكل جديد

دلوقتي هنشوف موديل جديد ومختلف، هنلاقي فيه إن الطرحة بتتلبس في الإيد، والطرحة دي بتليق على ناس كتيرة، وخصوصاً لو واحدة مليانة من منطقة الأكتاف.

وبالنسبة للفستان فهنلاقي إن الموديل لابسة بادي من تحت الكورساج ومن فوق بوليرو..

وفي ربطة الطرحة استخدمت أكتر من خامة؛ فأنا استخدمت ستان وبعدت عن التول، واستخدمت كروشيه وشيفون مقلّم، وعملت ربطة الطرحة بشكل ملكي شوية.

إضغط لمشاهدة الفيديو: 

..وبكده يكون خلص عددنا النهارده..
وأتمنّى إن الموديلات اللي قدّمناها تكون عجبتكم..
وإن شاء الله كل عروسة تكون زي القمر يوم فرحها..
بس أهم حاجة إن العروسة تختار المناسب لها وبلاش تجري ورا الموضة
عيد سعيد،،،

المصدر