احلى الاوقات: البيتزا بكل اسرارها (بيتزا الخضراوات,وبيتزا السجق)

النهارده هنعرف مع بعض أكتر من طريقة لعمل عجينة البيتزا..

وطرق مختلفة لتحضير أنواع بيتزا مختلفة زي اللي بتاكليها في المحلات...

طرق تحضير عجينة البيتزا
عجينة البيتزا هي أوّل حاجة هتعمليها، وإنتي بتحضّري للبيتزا؛ لأنها بتكون محتاجة وقت علشان تتخمّر..

وزي ما قلنا قبل كده فيه أكتر من طريقة لعمل عجينة البيتزا؛ يعني فيه ناس بتعملها ببيض ولبن، وفيه ناس بتعملها من غير بيض ولا لبن...

العجينة على طريقة نابولي بتكون من غير بيض ولا لبن

العجينة على طريقة نابولي
المقادير:

3 أكواب دقيق
2 ملعقة صغيرة خميرة بيرة
1/ 2 ملعقة صغيرة ملح
كوب ماء دافئ
3 ملاعق كبيرة زيت ذرة

الطريقة:
1- هاتي وعاء بلاستيك كبير، واخلطي فيه نصف كمية الدقيق مع الخميرة والملح، وبعد كده ضيفي المية والزيت، واضربيهم كلهم بمضرب البيض على سرعة عالية لمدة 3 دقائق.

2- ضيفي باقي الدقيق للخليط السابق، وقلّبيه باستخدام ملعقة خشبية.

3- انقلي العجينة على رخامة المطبخ أو على لوح خشبي، وابدئي في عجنها بإيدك لغاية ما تلاقيها بقت طرية ومطاطة وسهلة التشكيل، وبعد كده شكّليها لدوائر كبيرة.

4- انقلي العجينة في طبق بلاستيك أو طبق زجاجي كبير، وادهنيها بكمية صغيرة من الزيت، وغطّيها بقطعة قماش، وسيبيها في مكان دافئ لمدة ساعتين؛ علشان تخمر وحجمها يزيد.

*******************

العجينة على طريقة ميلانو بتحتاج بيض ولبن

العجينة على طريقة ميلانو
المقادير:

2 كوب دقيق
2 بيضة
2 ملعقة كبيرة زبدة
كوب لبن
ملح وفلفل
2 ملعقة صغيرة خميرة بيرة
1/ 2 ملعقة صغيرة سكر

الطريقة:
1- اخلطي الخميرة مع السكر.

2- هاتي طبق زجاج أو بلاستيك كبير، وحطّي فيه السمنة، واضربيها بالمضرب الكهربائي، وبعد كده ضيفي عليها باقي المقادير والخميرة والسكر، واضربيهم مع بعض بالمضرب، لغاية ما تلاقي العجينة بقت جامدة، شيلي المضرب واعجنيها بإيدك لغاية ما تلاقيها بقت طرية ومطاطة، وبعد كده غطّيها وسيبيها لمدة 3 ساعات عشان تتخمّر.

*******************

صلصة البيتزا من الحاجات المهمة جداً في تحضير البيتزا

بعد ما عملنا العجينة بأي طريقة من اللي قلنا عليها، هييجي وقت تحضير...

صلصة البيتزا
المقادير:

4 ثمرات طماطم مقشّرة ومقطّعة مكعبات صغيرة
4 ملاعق كبيرة صلصة طماطم
2 ملعقة كبيرة زيت ذرة
1 ملعقة صغيرة زعتر جاف مطحون
1 ملعقة صغيرة نعناع جاف مطحون
ملح وفلفل

الطريقة:
1- سخّني الزيت في طاسة على نار هادية، وبعد كده ضيفي الطماطم وصلصة الطماطم والزعتر والنعناع، و 3/ 4 كوب ماء، وسيبي الخليط على النار لمدة نصف ساعة علشان يتسبّك.

*******************

قطّعي الخضراوات حلقات ورصّيها على الوش

ودلوقتي تعالي نعرف بعض الطرق لتحضير البيتزا بنكهات مختلفة...

بيتزا بالخضراوات
المقادير:

عجينة بيتزا
1 ثمرة فلفل أخضر مقطّعة حلقات
1/ 2 كوب صلصة بيتزا
2 ثمرة طماطم مقطّعة حلقات
بصلة متوسّطة الحجم مقطعة حلقات
كوب مشروم مقطّع شرائح
2 فص ثوم مفروم
1 ملعقة صغيرة زعتر
1 1/ 2 كوب جبنة موزاريلا مبشورة
1/ 2 ملعقة صغيرة فلفل أسود
2 شريحة كرفس مقطّعة قطع صغيرة
زيتون أسود مقطع دوائر
أوراق ريحان للتزيين

الطريقة:
1- قطّعي عجينة البيتزا لقطع صغيرة مدوّرة، وحطّيها على رخامة المطبخ أو على سطح خشبي مرشوش بالدقيق، وابدئي في فردها لغاية ما مساحتها تكون مناسبة للصاج أو الصينية اللي هتعملي فيها، وبعد كده حطّيها في الصينية، بس خدي بالك إنك قبل ما تحطيها بتدهني الصينية بالزيت.

2- ضيفي صلصلة البيتزا فوق العجينة، ورشّي الثوم المفروم، وضيفي الفلفل الأخضر والطماطم والبصل والكرفس والزيتون الأسود والمشروم، ورشّي الفلفل الأسود، وقطّعي البيتزا على شكل مثلثات.

3- رشّي الجبنة الموزاريلا والزعتر على السطح.

4- سخني الفرن على درجة حرارة عالية شوية، وبعد كده دخّلي صينية البيتزا في الفرن لمدة 15 دقيقة، وبعد ما تلاقي وشها إحمرّ، خرّجيها.. وبالهنا والشفا.

*******************