مع الشيكولاتة وداعاً للاكتئاب

عددنا النهارده مختلف ولذيذ.. ولو بدأتي تقرأيه مش هتقدري تسيبيه!!!

ده لأنه بيتكلّم عن حاجة معظم الناس بتحبها بنات وولاد كبار وصغيرين...

وهي الشيكولاتة اللي ظلموها وقالوا إنها سبب رئيسي في زيادة الوزن، ومش عارفين إنها زي أي حاجة لمّا بنزوّد منها بتضر...

بس النهارده هنتحدّى كل الشائعات دي وهناكل شيكولاتة زي ما إحنا عايزين...


مع الشيكولاتة وداعاً للاكتئاب
كل الدراسات اللي اتعملت عن الشيكولاتة أكّدت إنها بتحسّن المزاج وبتقلل من الإحساس بالحزن والضيق؛ لأن فيها مادة الإندروفين اللي بيفرزها المخ وبتديكِ إحساس بالابتهاج والسعادة..

وكمان الشيكولاتة بتحتوي على فيتامينات زي فيتامين "ب 1"، "ب 2" وفيتامين "هـ"؛ ده غير معادن: البوتاسيوم، والصوديوم، والماغنسيوم، والفوسفور، والزنك، والنحاس، والمنجنيز، والكالسيوم.

والشيكولاتة كمان فيها مواد بتزوّد من معدلات الانتباه واليقظة وزيادة الأداء الذهني، وفيها كمان ما لا يقل على 300 مركب كيميائي طبيعي بتتفاعل مع حاسة التذوّق والرائحة الموجودة في أطراف اللسان، والمتصلة بالمخ علشان تزوّدك بالطاقة والإحساس بالرضا والشبع.

بس أهم حاجة إنك ما تزوّديش عن قطعتين شيكولاتة صغيرين في اليوم؛ علشان تحافظي على وزنك، وكمان صحتك وحالتك النفسية.

والنهارده هنعمل مع بعض أكثر من وصفة بالشيكولاتة علشان تدلّعي بيهم نفسك وتفرّحي عيلتك...

ممكن تزيّنيها ببيض الشيكولاتة

تورتة الشيكولاتة بالبندق
دي وصفة سهلة، وهتأخذ منك في إعدادها ساعة ونصف، بس اوعي تاكلي صوابعك وراها...

المقادير:
200 جرام شيكولاتة خام مفرومة
كوب سكر بني "متوافر في السوبر ماركت"
معلقة فانيليا
بيضتين
كوبايتين إلا ربع دقيق
ربع كوب كاكاو
كوب إلا ربع لبن حليب
كوب شيكولاتة بالبندق، وفيه منها أنواع كتيرة موجودة في أي سوبر ماركت
للتزيين ممكن تستخدمي قطع الشيكولاتة اللي على شكل بيض، ودي بتكون موجودة في السوبر ماركت أو في محلات الحلويات، وممكن كمان تستخدمي الكريم شانتي أو الفراولة. 200 جرام زبدة طريّة "مش مثلّجة"

الطريقة:
1-حضّري صينية مناسبة للتورتة، وادهنيها بالزبدة، وسخّني الفرن على درجة حرارة متوسطة.
2- أحضري الشيكولاتة الخام، وسيّحيها في حمام ماء دافئ بإنك تحطي الشيكولاتة في طاسة فوق حلة فيها مية بتغلي، علشان تسيح بسخونة بخار المية، وبعد ما الشيكولاتة تسيح سيبيها تبرد شوية..
3- اضربي البيض مع السكر والفانيليا بالمضرب الكهربائي لغاية ما يبقى شكلهم كريمي. 4- ضيفي الشيكولاتة اللي سيّحتيها على الخليط، واضربيهم مع بعض كويس
  5 - اضربي اللبن مع الكاكاو والدقيق، وبعد كده ضيفيهم على الخليط السابق، وامزجيهم مع بعض كويس لغاية ما يتجانسوا، وصبّي الخليط في الصينية ودخليها في الفرن السخن.

6-- سيبي الصينية في الفرن لمدة ساعة، وبعد كده اختبري العجينة كل فترة بإنك تحطي فيها سكينة، ولو طلعت نظيفة من غير عجين عليها تبقى استوت، وبعد كده طلعيها من الفرن وسيبيها تبرد.
7- ابتدي غطي التورتة بشيكولاتة البندق "نوتيلا"، وزيّنيها ببيض الشيكولاتة أو الفراولة أو الكريم شانتي، وحطيها في طبق التقديم... وبألف هنا وشفا.

                                             ********************

الطبق ده جامد جداً وسهل أوي

بسكويت الكراميل والشيكولاتة
أما الطبق ده فجامد جداً وسهل أوي، وكمان جديد، وهيعجبك، ومش هيأخذ منك غير نصف ساعة...

المقادير:
باكو بسكويت سادة "يُفضّل ماري أو دايجستيف"
عبوة لبن مكثّف "متوافر في السوبر ماركت"
نصف كوب شربات
قوالب كيك صغيرة "موجودة في أي محل أدوات منزلية" 90 جرام زبدة سايحة 200 جرام شيكولاتة خام مبشورة 150 جرام كريمة لباني
الطريقة:
1- سخّني الفرن على درجة حرارة متوسّطة.

2- ادهني القوالب الصغيرة بالزبدة.

3- أحضري البسكويت وكسّريه لقطع صغيرة جداً لغاية ما يبقى زي البودرة، وبعد كده اعجنيه مع نصف مقدار الزبدة اللي عندك لغاية ما يبقى عجينة متماسكة.

4- حطّي العجين في القوالب وافرديه بأطراف صوابعك، وبعد كده حطي القوالب في الفرن لمدة 8 دقائق أو لغاية لما العجين يبقى لونه ذهبي.

5- في نفس الوقت أحضري اللبن المكثّف والشربات وباقي مقدار الزبدة، وحطيه في حلة على النار، وقلّبيهم لغاية لما الزبدة تسيح وبكده تكوني عملتي الكراميل.

6- صبّي الكراميل بالتساوي على البسكويت اللي في القوالب الصغيرة، ودخّليه الفرن تاني لمدة 10 دقايق؛ وبعد كده طلعيه وسيبيه لغاية لما يبرد.

7- أحضري الشيكولاتة والكريمة اللباني، وامزجيهم سوا على نار هادية لغاية لما الشيكولاتة تسيح وتمتزج بالكريمة.

8- صبّي الشيكولاتة على البسكويت والكراميل من فوق، وحطيه في الثلاجة لمدة نصف ساعة.

9- طلعيه بعد كده وحطيه في أطباق التقديم.. وبألف هنا وشفا.

                                        ********************

هتستخدمي فيها 3 أنواع للشيكولاتة

كيكة الشيكولاتات الثلاثة
الكيكة دي مكوّناتها كلها سهلة ومتوافرة، وخذي بالك من إنك هتستخدمي فيها 3 أنواع للشيكولاتة؛ وهم: الشيكولاتة الخام، والشيكولاتة باللبن، والكاكاو والكيكة دي هيحبها أوي كل عشاق الشيكولاتة...

المقادير:
250 جرام زبدة
ربع كوب لبن
كوب سكر بودرة
كوب دقيق
ربع كوب كاكاو
كريم شانتي "للتزيين"
3 بيضات 100 جرام شيكولاتة باللبن "أي نوع تحبيه" 200 جرام شيكولاتة خام مبشورة
الطريقة:
1- سخني الفرن على درجة حرارة متوسّطة.

2- أحضري الصينية وادهنيها زبدة.

3- حطي الزبدة والشيكولاتة الخام واللبن مع بعض في حلة على نار هادية، وقلّبيهم لمدة 12 دقيقة لغاية لما يمتزجوا مع بعض، وبعد كده اطفي البوتجاز، وسيبي الخليط السابق لمدة ربع ساعة علشان يبرد.

4- ضيفي البيض والسكر والدقيق والكاكاو على الخليط، وقلّبيهم مع بعض لغاية لما يبقى عجين متجانس، وبعد كده ضيفي عليه نصف مقدار الشيكولاتة باللبن وقلبيهم كويس.

5- صبّي العجين في الصينية المدهونة بالزبدة، ورشي على وشها باقي مقدار الشيكولاتة اللي باللبن.

6- دخليها الفرن لمدة ساعة وربع أو لحد ما تستوي، وده هتعرفيه زي ما قلنا قبل كده بإنك تحطي فيها سكينة، وتطلع نظيفة من غير عجين.

7- وبعد ما تستوي طلعيها من الفرن وسيبيها تبرد، وقطّعيها وحطيها في طبق التقديم مع كريم الشانتي.. وبألف هنا وشفا.
                                            ********************

إكلير لذيذ مش هيأخذ منك أكثر من 45 دقيقة

إكلير الشيكولاتة بالكاستر
الإكلير ده بنات كثير بتحبه وبتسأل على طريقته، دلوقتي هتقدري تعمليه بكل سهولة، ومش هيأخذ منك أكثر من 45 دقيقة...

المقادير:
ربع كوب لبن
ربع كوب ماء
نصف كوب دقيق
بيضتين
100 جرام شيكولاتة سايحة 50 جرام زبدة

مقادير الكاستر:
كيس كاستر من السوبر ماركت
كوب لبن
نصف كوب سكر بودرة

الطريقة:
1- سخني الفرن على درجة حرارة متوسطة.

2- أحضري الصينية وافرشي في قاعدتها ورقة زبدة.

3- حطي اللبن والمية والزبدة في حلة تيفال على نار متوسطة الحرارة، وقلبيهم مع بعض لمدة 5 دقايق أو لغاية لما الخليط يبدأ يغلي.

4- شيلي الخليط من على النار، وبعد كده ضيفي عليه الدقيق، وقلّبيهم مع بعض بمعلقة خشب لغاية ما تلاقي الخليط تماسك ويتحوّل لعجين ويبقى كتلة واحدة، وبعدين طلعي العجينة من الحلة وسيبيها تبرد.

5- بعد ما يبرد العجين ضيفي عليه البيض، بس خذي بالك من إنك هتضيفي في كل مرة بيضة واحدة وتضربيهم مع بعض كويس بالمضرب الكهربائي لغاية لما الخليط يتجانس مع بعضه.
6- بعد كده أحضري كيس قماش أو بلاستيك وافتحي فيه فتحة صغيرة علشان تحطي فيها "البلبلة" اللي هتشكل الإكلير.

7- حطي العجين بتاعك جوه الكيس أو القمع المخصوص بالإكلير، واللي بيكون شبه القمع الخاص ببلح الشام بس على أعرض وأطول شوية.

8- رصّي الإكلير في الصينية اللي فرشتي فيها ورقة الزبدة، ودخليه في الفرن لمدة 20 دقيقة أو لغاية لما تلاقيه نفش ولونه بقى ذهبي.

9- بعد كده طلعيه من الفرن، وافتحي في كل قطعة فتحة صغيرة من الجنب، ورجعيه الفرن تاني لمدة 10 دقايق، وبعد كده طلعيه تاني علشان تحشيه بالكاستر.

10- علشان تعملي الكاستر، بتحطي الكاستر واللبن والسكر مع بعض في حلة على نار هادية، وقلّبيهم كويس لغاية لما يتحوّل عجين، وبعد كده شيليه من على النار وسيبيه 5 دقايق يبرد، وغطّيه بورق بلاستيك ودخّليه الثلاجة لمدة نص ساعة.

11- زيّني الإكلير من فوق بالشيكولاتة.. وبألف هنا وشفا.