طريقة عمل الكوردون بلو

طريقة عمل الكوردون بلو

المقادير:
كيلو صدور فراخ مخلية ومقطعة قطع رفيعة.
2 بصلة كبيرة.
2 حبة فلفل رومي مفروم.
ملعقة خل.
3 ليمونات.
ملح وفلفل أسود، والكمية على حسب الرغبة.
قرفة.
خلة الأسنان.
2 بيضة.
ملح وفلفل للبيض.
1 كوب دقيق.
2 كوب بقسماط مطحون.
كمية كبيرة من الزيت للقلي.

للحشو:
1/ 8 كيلو جبنة شيدر.
1/ 8 كيلو لانشون أي نوع.
1/ 8 كيلو زيتون مقطع "أسود أو أخضر".

الطريقة:    
1- افرمي البصل كويس جداً واعصريه وخدي الميه بتاعته؛ لاستخدامها في التتبيلة.

2- ضعي ماء البصل في وعاء عميق ومعاه الملح والفلفل والخل وعصير الليمون والفلفل الرومي المفروم والقرفة، وقلبيهم كويس مع بعض، وبكده تبقى حضّرتي التتبيلة.

3- ضعي صدور الفراخ في التتبيلة وسيبيهم لمدة ساعتين.

4- بعد ما الفراخ تتّبل، هنبدأ في حشو صدور الفراخ وكل اللي عليكِ إنك تفردي قطعة الدجاج وضعي عليها شريحة من الجبن الشيدر، وعليها شريحة لانشون، وقطعتان من الزيتون المقطع.

5- لفي صدور الفراخ على الحشو واقفليه كويس، واحكميها بغلق الجوانب المفتوحة بخلة الأسنان.

6- قلّبي صدور الفراخ الملفوفة في الدقيق وبعد كده حطيها في البيض، وبعدين غطيها بالبقسماط كويس من كل الجوانب.

7- سخني الزيت كويس جداً على نار عالية وابدئي بوضع الكوردون في الزيت واحدة واحدة بحرص، وبعد كده خففي النار علشان تتحمر على نار هادية، وقبل ما تشيليها من الزيت علّي النار علشان تكون مقرمشة.

ولو عايزة تظبطي الأكلة تمام وتبقى ولا أحسن شيف ممكن تعملي مع "الكوردون بلو" صوص الكريمة بالكرّات.

ومكوناته هي..
كرّات مقطع قطع صغيرة.
2 معلقة كبيرة زبدة.
1/ 2 كوب كريمة لباني مخفوقة.

ودي طريقته..
1- سخني الزبدة في طاسة صغيرة على نار هادية، وبعدين ضيفي عليها الكرّات المقطع، وسيبيهم على النار من 7 إلى 8 دقائق مع التقليب المستمر.
2- ضيفي عليهم الكريمة وسيبيهم لغاية ما الكريمة تسخن، وبعد كده قدّمي الصوص مع الـ"كوردون بلو" وهو ساخن.. 

وبالهنا والشفا