الأربعاء، 23 يونيو 2010

مواقف بنقابلها فى حياتنا الزوجية

اولا صباح او مساء الخيرات على كل المتزوجات



إسمحولى أنقل ليكم مواقف
 مواقف خااااااصه جدا
يمكن بتحصل معايا
أو معاكى
أو مع واحده صاحبتك
لكن الأكيد
إنها مواقف بنقابلها فى حياتنا الزوجيه

  
فهرس للمواضيع
 
الموقف الأول ..أنا محتاجه أجازة


الموقف التانى ..دى مراتى مش خطيبتى


الموقف الثالث.. زوجى يتهمنى بالبرود


الحصة الأولى كيف تنفذين طلبات زوجك


الحصة الثانيه كيف تحتفظين بصداقة زوجك


الحصة الثالثة كيف تكسبين ود حماتك


الحصة الرابعة كيف تفهمين شخصية زوجك


الحصة الخامسة كيف تحافظين على سعادتك


الحصة السادسة كيف تتغلبين على الملل الزوجى


الحصة السابعة تعلمى فن الشجار مع زوجك


الحصة الثامنة كيف تتعاملين مع الزيارات المفاجئة



((الموقف الأول ..أنا محتاجه أجازة))
  

وأنا أجلس أمام الكمبيوتر أعمل فى صمت ظهرت أمامى فجأة نافذة محادثه
كانت صديقتى المقربة إلى قلبى
وإذا بها تقول لى أنا عاااااااوزه أجااااازه
تعجبت فهى مثلى لا تخرج للعمل فقلت لها من إيييه
فقالت من حياتى الزوجيه
وأنفجرت تقول
أنا خلاااص تعبت مش حاسه إن فيه حد حاسس بيه
حاسه إنى بلف فى دايره لوحدى والكل بره الدايره دى بيتفرج عليا
تخيلى
طوووووول الليل سهرانه ببنتى مش عارفه أنام ساعتين على بعض
مابين رضاعه وغيار ووأوأه
لدرجة إنى بعد الفجر بشويه روحت فى غيبوبه وأنا قاعده
بقيت بنام زى الحصنه يا إما وأنا واقفه أو وأنا قاعده
آه والله بفصل فجأة
والبنت على إيدى بترضع
وزى الحلم سامعه صوت المنبه من بعييييييد
وألاقى إيد بتزقنى طبعا إيد جوزى
وهو بيقووووول
المنبه ضرب مش هاتقومى تصحى الولاد للمدرسه
حسييييت إنى هايجيلى سكته قلبيه من كتر الغيظ
شيلت البنت براحه وحطيتها فى سريرها
وجريت أصحى الولاد للمدرسه وجهزت الفطار والسندوتشات
وخرج يوصلهم زوجى العزيز
حسيت إنى مش شايفه قدامى وفجأة سمعت صوت بنوتى جريت أنيمها
نمت وأنا قاعده على السرير
قوووووم أصحى على إيد بتزقنى
يعنى أنزل شغلى من غير فطار طبعا ماهو أنا خارج حساباتك
بصيت بعين مقفوله وقلت حالا يا حبيبى
جهزتله الفطار وإستنيت لحد ماخرج الشغل
قلت ألحق أجرى أنام شويه
لاقيت بنوتى صاحيه وضحكه بريئه على وشها
طبعا نسيت النوم
وكملت يومى عادى
لكن كل ما أفتكر منظره وهو بيقومنى وهو شايفنى طول الليل قاعده بالبنت أحس إنى بلف فى ساقيه
حاسه إنى مقهوره
مفيش حد حاسس بيا

خلص كلام صاحبتى
 ولاقيت نفسى ببص لكلامها وبقول ياترى إللى كاتبه الكلام دا أنا والا هى





((الموقف التانى ..دى مراتى مش خطيبتى))
جلست بجوار زوجى الحبيب فى سيارتنا
كنا قد أنهينا زيارة عائليه وفى طريقنا للعوده إلى منزلنا
كان أطفالى حبايبى يستغرقون فى نوم عميق فى الخلف
وعندما حاولت إدارة حديث معه أثناء الطريق
نبهنى بهدوء أنه مرهق ويريد أن يركز فى القياده
فغرقت فى صمت عمييييييق

وأثناء توقفنا فى إحدى الإشارات
أقبل علينا أحد باعة الزهور
وعندما رأيته إرتسمت على وجهى إبتسامة وتذكرت أيام زماااااااااااان عندما كان زوجى يقدم لى فى كل زياره أثناء الخطوبة باقة ورد رائعة
يااااااااااااااااااااااااااااااااااه من زمااااااااااان ماجبليش ورد
ومد البائع يده بورده حمراء جميله قائلا ورده يا أستاذ
فقال زوجى فى إقتضاب
شكرا

فعاد البائع يمد يده قائلا ربنا يخليلك الهانم
فقال زوجى فى ضيق
شكرا

عاود الرجل العرض مرة أخرى
فإذا بزوجى الحبيب يرد عليه غاضبا
قلت لك شكرا إنت فاكرها خطيبتى دى مراتى


كنت أراقب الموقف فى صمت وأنا أنتظر أن يأخذ زوجى الورده ويقدمها لى بكل الحب
ورده مجرد ورده
وإذا بى بعد رده أشعر بإنقباض فى صدرى
وكأن يدا إمتدت تعتصر قلبى بقوة
دى مراااااتى

ظلت الكلمه ترن فى أذنى
وكلما سمعتها تدمع عيناى
ياله من رد
يالها من معانى جميله تحتويها تلك الكلمات
ولم أشعر سوى بدموعى تنهمر على خدى
وأنظر لزوجى وأقول له من كل قلبى
شكرا

ونظر لى زوجى فى إستغراب
وعاد ينظر للطريق

((الموقف الثالث.. زوجى يتهمنى بالبرود))
رن جرس التليفون ووجدت إحدى قريباتى تحدثى بصوت حزين
وفاجأتنى قائلة
جوزى بيقول عليا بااااااااااااااارده
إستغربت وقولتلها معلش مش فاهمه يعنى إيه
سكتت وقالت لى فى إنكسار
تصدقى إن جوزى ماقربش منى من أكثر من شهر
لييييييييييه يا بنتى هو كل واحد فيكم نايم فى أوضه والا إيه
قالتلى بالعكس إحنا الإتنين فى أوضه واحده وفى سرير واحد لكن مفيش حتى ولا لمسه ولا حضن
شعرت بالإحراج فأنا لا أجيد الحديث فى تلك الأمور
ولكنها لجأت لى
وعندما طالت فترة صمتى قالت لى
أنا محتاجه أفضفض معاكى حاسه إنى هاتجنن
إنتى عارفه إننا تزوجنا عن قصة حب الكل يشهد بها
تحدينا كل الظروف وتخطينا كل العقبات حتى جمعنا الله فى بيت واحد
حتى تلك اللحظة مشاعرى نحو زوجى مثل أول مره رأيته فيها
نفس دقات القلب والحب الجارف والسعادة التى تملأ عيونى لمجرد رؤياه
ولكن
لا أعرف ماذا حدث
كان فى السابق عندما أغيب عنه يوما واحدا يشعرنى بأننى غبت عنه شهورا طويله
يقابلنى بكل الشوق والحب والرغبة
تصورت أننا سنظل هكذا حتى آخر العمر
ولكن
منذ أسابيع طويله يتكرر معى نفس السيناريو
يخرج فى الصباح الباكر لعمله ولا يعود إلا بعد العاشرة مساء
بعد العشاء يستلقى أمام التليفزيون يشاهده فى صمت غريب
حتى يغرق فى النوم وهو جالسhttp://forum.amrkhaled.net/images/smilies/blue.gif
أوقظه بهدوء ليدخل سريره
فيدخل السرير ويغرق فى نوم عميييييق
أقترب منه أشتاق للمسة يديه أحتاج لأن يضمنى فى صدره
فلا يشعر بى
وبعد قليل يستيقظ إبنى الصغير فأقضى باقى الليل بين رضاعة وهدهده
حتى الفجر
وعندما مرت الأيام والأسابيع وزاد شوقى له وسيطرت الحيرة على عقلى
واجهته وسألته فيه إيه
ففاجأنى بقوله
يعنى إيييه المجهود إللى بتبذليه عشان تحسسينى برغبتك فيا
مابتشوفيش الستات فى الأفلام بيعملوا إيه
ثم إتهمنى بالبرود واللامبالة وإن الموضوع مش فارق معايا
وقال
كفايه عليكى البيت والأولاد
صدمتنى كلماته
وجلست أحادث نفسى وشعرت بأننى سوف أجن
قلت أكلمك قبل ما أصرخ والناس تتلم عليا
أعمل إيييييه
والله مش عارفه أعمل إيييييه


ماعرفتش أرد عليها لأنى بطبيعة الحال وجدت نفسى أشعر باقتراب خطر داهم نحوى

فزوجى بقاله يومين بيناااااااام قداااام التليفزيون

يالهووووووووى



الحصه الاولي
في حالة طلب الزوج لاي طلب تشعرين انك لن تستطيعين تنفيذه

طبعا الراجل إللى بقى زوجك لما حضرتك وقعتي علي استلامه اخدتيه من بيت العز (ده رأيه)

واقصي مجهود كان بيعمله انه يفرد ضهره كده ويطلب اللي هو عاوزه(حتي لو الكلام ده وهمي برضه حيحاول يفهمك كده ابقي فوتيها)
يعني بالعربي كل انثي اتعامل معاها في بيت اهله كانت مسخره لخدمة حضرته
ويا سلام لو كان ربنا اعطاه 3 او 4 اخوات بنات يبقي كده كملت
طبعا بناء عليه حتلاقيه مايعرفش حاجه عن ثقافة اخدم نفسك وحيطلب حاجات كتير جدا في وقت واحد ومعظمها حاجات عمره ماطلبها
طيب حتعملي ايه بقي ؟؟؟؟

اول خطوه لازم تستقبلي كل الطلبات بابتسامه
ولازم يحس ان طلباته اوامر وياسلام لو كان في ايدك حاجه وسبتيها
عشان تنفذي طلبه

مثال عملى
حضرتك بتطبخي وطلب تخيطي زرار قميص
هو:ياهانم القميص زراره مقطوع(وهو عنده 10قمصان بس حبكت)
حضرتك:حاضر حالا ياحبيبي(وتوطي النار وتطلعي بابتسامتك الساحره)
وبعد ثانيتين بالظبط من مسكك للابره والفتله
من فضلك ياحبيبي روح بص علي الاكل احسن يتحرق ده انا عامله لك........
تفتكري مش حيروح؟
حتلاقيه يا اما راح خايف على الأكل إللى بيحبه
أو إستخسار لثمن الأكل إللى ممكن يتحرق
يا اما ياخد منك القميص ويقولك عنك إنتى يا روحى وكمل الخياطه لنفسه
يبقي ملخص اول درس

1_استقبلي الطلب بود وابتسامه
2_اشرعي بالفعل في تنفيذ الطلب
3_دبسيه بالمهمه اللي كنتي بتنفذيها





أتمنى يكون الدرس الأول وااااااااضح
مستنيه تعليقاتكم طبعا
والتطبييييق العملى أهم حاجه
كل واحده تدبس جوزها تيجى تدينا خبر




الدرس التانى
ماذا تفعلين حتى تحتفظى بصداقة زوجك..خدى باااالك


خلاص سايبه بيت أهلك ورايحه على عش الزوجيه وتبدأ النصايح من أجل السعاده الأبديه
وتلاقى نصيحه عماله تلف وتدور حواليكى
خدى بالك يا حبيبتى إنتى كل حاجه لجوزك
خليكى مراته وأمه وأخته وصاحبته و.. و..
وسيادتك بتسيبي كل العلاقات دي وتمسكي قوي في خليكي امه
أولا لو زوجك أمه موجوده وربنا يبارك صحتها يبقى ماتحاوليش هى طبعا ست الحبايب ومش ممكن تاخدى مكانها


ثانيا حتي لومقطوع من شجره مين فهم حضرتك ان الاخ عريض المنكبين اللي اخدتيه عاوز ام بديله؟

وبعدين الام لها ادوار كتيييير في حياة الابن
1/ التربيه

ودي انتهت بالنسبه له خلاص مش معقول هاتربيه من جديد
2/ الحنان
اه هو محتاجه بس نوع جديد من الحنان غير حنان الام طبعا
3/مساعدته في امور حياته
ودي مسئوليه اتنقلت ليكى بجوازكم مش بإختيارك يعنى حتي لو امه عايشه
4/ مراقبة سلوكياته وتوجيهها
المشكله بأه ان معظم (هن)يسيبوا كل الادوار الحلوه إللى فاتت دي للام ويتفننوا في تمثيل الدور الرقابي
(لازم اعرف عنك كل حاجه)

طبعا يا حبيبى مش مراتك وبقيت مسؤوله عنك
على إعتبار إنه مش عارف مصلحته
(لازم تقول لي علي اي حاجه قبل ماتعملها)
آه لازم تاخد رأيى الأول
على إعتبار إن مستوى تفكيره إنخفض بعد الزواج


تكتر قوي كلمة لازم اللي معظم(هم)بيكرهوها
ده غير الموهبه العظيمه اللي أغلب الستات ماشاء الله محترفين فيها وكأنهم خريجى مدرسة المخابرات

في تفتيش الجيوب والادراج وانتهاك الخصوصيه والاعلان عن اي حاجه غلط تلاقيها وتبتدي العركه

احرصي دايما علي خصوصية حضرته وثقي انه حيكشف لك كل الاوراق يعني حيروح منك فين
حتي اذا وقعت في ايدك حاجه ماتعلنيش عن كشفك ليها

وكأنك لاقيتى أثر من الآثار الغارقه


والزوجه بمجرد الزواج لازم تعرف ان الزوج مش محتاج من الستات في حياته غير اتنين بس
الزوجه والصديقه
ممكن جدا تكونى زوجه ناجحه جدا جدا حتى لو فيه خناقه كده والا كده من وقت للتانى

بس أهى خناقه تفوت ولا حد يموت وأهى ماشيه
وده اللى موجود فى كل بيوتنا
لكن النادر فعلا فى بيوتنا الشرقيه إنك تكونى صديقه تقدر تحتوى هذا الكائن اللى هو الراجل طبعا
وده السبب الرئيسى وراء بحث الزوج عن مصادر تانيه
القهوه

اصحابه العزاب وما ورائهم
كرهه التواجد في البيت وخدي عندك لحد العلاقات النسائيه
كل ده بيدور علي صديق

والمبرر موجود
ياعم انا متجوز المفتش كرومبو
انا محتاج حد اتشارك معاه اسراري وانا ضامن انه مش حيمسكها عليا ذلة في اول خلاف

يبقي لازم الست تعيش بشخصيتين
(شيزوفرينيا اراديه)
أييييييييون
عشان تقدر تستقبل اي فعل من الزوج برد الفعل المناسب

يعني اعرف زوجات وهم في الشارع مع ازواجهم هي اللي بتقول له شوف البنت دي لابسه ايه؟

دي رفيعه
دي سمرا
دي حلوه
يعنى تحطى على قلبك تكييف 100 حصان
وتحطى أعصابك فى ديييب فريزر بس مش أى ماركة
إختارى نوع شديد


كده يتشجع الافندي ويعرف ان مافيش حساسيه من مناقشة اي
موضوع معاكى
والله يكون فى عونك على صحتك اللى هاتروح هدر

ضغط وسكر ونوبات قلبيه متكررة
لكن كله يهوووون
نموت ونموت وتحيا الصداقة
طبعا مع أزواجنا


يبقى ملخص الحصة دى

1- انت لست بأم لزوجك فهو لا يحتاج امومتك له
2- احترمي اسرار زوجك الشخصيه وتعاملا كأثنين عند هذا الموضوع
3- ركزي علي دورك كصديقه له فأنت زوجته شئتما ام ابيتما اما الصداقه فعلاقه اختياريه
4- لا تشعريه بحساسيتك تجاه الحوار في اي موضوع مهما كان يضايقك حتي لا يتردد في مصارحتك بمشاكله

والله ولى التوفيق

أى حاله مرضية تصاب بيها أى واحده بعد الحصة دى تبقى تبلغنا ده دليل نجاحك فى تطبيق الدرس 
 


الدرس الثالث
حماتك تعباكى ...تعلمى كيف تكسبين ودها


العلاقه الأبديه والمشكله الأزليه
الزوجه وحماتها
زى توم وجيرى
أو لوريل وهاردى
أو سنووايت والساحرة الشريره
كل واحده وذوقها
المهم إنهم ثنائى ملتصق لا يمكن إنفصاله أبدا


طبعا الدرس ده موجه لسيدات معينه
يعني اللي مرتاحه مع حماتها ربنا يهنيها بيها بس برضه تقول لنا وصلت لكده ازاي وتفيد أخواتها المعذبات


طيب أولا مين هى حماتك
إوعى تفتكرى إنها أم زوجك فقط
لا لا لا
كلمة حماتك تشمل ام زوجك او اخته او عمته
المهم حماتك هي
التي تعتقد ان ربنا خلقها لتحمي زوجك المسكين من تصرفات حضرتك
وحتلاقيها كل يوم والتاني تنط لك وتعمل فحص وتمحيص عام لبيتك والحجج كتير
خدى عندك
كنت معديه قلت افوت اخد الجمعيه
اصل تفيده بنت خالتي ساكنه في الشارع اللي جنبكم
(ملحوظه حتي لو عزلتي برضه تفيده حتعزل معاكي ماتحاوليش)
وحشتووونى من إمبااارح ماشوفتكوووش

طيب النقطة المهمه إللى لازم تاخدى بالك منها وإنتى بتفكرى إزاى تخلصى من هذا العدوان
اننا عاوزين نمنع التدخل وفي نفس الوقت نحافظ علي العلاقه

طبعا اهم حاجه انسي ان الموضوع منافسه وبلاش تحرصي علي انها ماتمسكش حاجه
وتأزمى نفسيتك لو سمعتى منها كلمتين تلاته
خااااااااااالص
بالعكس من وقت للتاني سيبي لها فريسه تمسكها وحسسيها ان ربنا بيبعتهالك نجده من السما
أو انها طوق النجاة فى بحر حياتك الغريقه
عشان تحول حياتك بعبقريتها وخبرتها للاحسن وانك من غيرها كنتي هاتغرقى فى شبر ميه

مش عيب من وقت للتاني تتصلي انتي بيها وتطلبي مساعدتها لحضرتك
النهارده نفسى أعمل ملوخيه زى اللى أكلتها عند حضرتك من يومين ياريت تقوليلى أعملها إزاى
يااااا سلاااام على الرز يا ماما من إيدك تحففففه بتعمليه مفلفل إزاى
(وإسمعى من الودن دى وطلعى من الناحيه التانيه)

وكمان إبدأى اخترعي مشاكل بتحصل لناس قرايبك أو حد من صاحباتك واحكي لها عليها واطلبي نصيحتها بعد ماتفهميها ان الدنيا كلها مش لاقيه حل وانها اخر امل

كمان إبدأى حسسيها دايما إنك مالكيش حد فى الدنيا غيرها هى وزوجك وإنك بتشوفيها أكتر ما بتشوفى أهلك
حسسيها انك بزواجك من ابنها انتقلتى الى عالمهم
وتخليتى عن عالمك الخاص

أما بأه زوج حضرتك وننوس عين العيله
إبدأى فهميه ان امه بتتعب معاكي وبتشيلك من على الأرض شيل وان ضميرك مش مستريح لانك بتتعبيها ونفسك تروحي لها كل يوم تساعديها

وطبعا بعد كام مره هايحس الاستاذ ان ده علي حساب بيتك لكن مش قادر ينطق
حتلاقي حضرته بيخترع اعذار عشان يفك الالتحام اللي بينكم
ويبعدك شويه عن حماتك حبيبتك اللى إنتى مش قادره على فراقها

أما اذا كانت حماتك عندها بنت لسه انسه أو أصغر منك اهتمي بيها كأنها اختك ده تصرف سره باتع مع الامهات
تاخديها معاكى فى كام خروجه
على كام فسحة
وتاخدى رأيها لما تييجى تشترى حاجه
وتجيبلها هدايا فى المناسبات السعيده
وتدلعيها وتهننيها
وتهتمى بمشاكلها وتقربى منها
واهم حاجه احنا يهمنا حماتك هي اللي تحس باهتمامك ببنتها
يعنى كل حاجه تعمليها علنى
وتذيعى فى وسائل الإعلام كمان
أما موضوع إنه بينك وبينها
لااااااااااا إنسى
دى مش صدقه هانداريها

يبقي ملخص الحصه التالته


1 / حماتك سيده غريبه عنك عامليها بذوق ولكن دون تباسط


2 / اصنعي منها امام نفسها ملاك ارسله الله لانقاذك من متاعبك


3 / اذا زاد اهتمامك بها فليكن ظاهر ومؤثر علي بيتك لانك سيده واحده ولست اثنين


4 / اهتمامك بمن تحبهم حماتك هو اهتمام بحماتك


5 / اشعري حماتك انك تنسحبين بالتدريج من عائلتك لتنضمي لعائلة زوجك


ملحووووظه
أى واحده هاتفضل علاقتها بحماتها متوتره أو فيها قلق بعد الحصة دى يبقى العيب من عندها وبلاش تاخد دروس أحسن




الدرس الرابع


الزوجه الشاطره تفهم شخصية جوزها


إزيكم يا أخواتى المتزوجات القدامى والجديدات وإللى لسه فى الطريق
طبعا كل واحده إتجوزت عن حب أو مرت بفترة خطوبه طويله هاتبقى فاكره نفسها مش محتاجه للدرس ده
هاقولك لااااااااااا فاهمه غلط
لأن من واقع تجربتى الشخصيه هاقدر أقولك إن الجواز عن حب هو أكبر وهم ممكن تعيشيه بأنك فاهمه شخصية روميو جوزك ومتجوزاه وإنتى عارفاه زى روحك
لأن بعد الجواز وبعد ماتصحى من الغيبوبه والأحلام الورديه تتبخر
هاتلاقى نفسك بتقابلى شخصيه جديده تماما عليكى
وتتفاجئى بإن روميو بقى عنتره بن شداد
أو أحمد بقى حسين
وتسألى نفسك أنا متجوزه مين

وتلاقى نفسك بتحاولى تفهميه من أول وجديد
وتفضلى تسألى فى كل موقف ...مين ده؟؟
لأن غشاوة الحب بتخليكى مش شايفه حاجات كتير
أو بتشوفيها بس بتعديها عشان خاطر عيونه
وفى الحاله دى هايحصل حاجه من إتنين
يا إما الصدمه تحولك لحالة الغضب ويحصل الصدام عند كل موقف
ويتحول عش الزوجيه لساحة حرب أهليه
وإللى مايشترى يتفرج
وتلعنى الحب وسنينه
يا إما تستسلمى للأمر الواقع وتتحولى لحالة من الإحباط
وبالتالى تفقدى حيويتك وتصبح حياتك بحيرة راااكده
وإنى أتنفس تحت الماء
وأهى عيشه والسلام وأنا إللى جبت دا كله لنفسى
لكن
ليه ماتدوريش على حل وتحاولى تتأقلمى مع الواقع وتستفيدى منه
والحل إنك ماتقارنيش بين روميو الخطوبه وعنترة الزواج
ولا تتحسرى على الصفات والمميزات اللى راحت فى الوبا
لأن بعد الجواز مافيش حاجه إسمها مميزات وعيوب
كل الصفات مميزات المهم كيفية التعامل

الزوج المنفتح والزوج المتحفظ


طبعا الزوج المنفتح زوج اجتماعي يجيد الترحيب بضيوفه ويهوي استقبال الغير واقامة العزائم والولائم(كلما امكن) له اصدقاء وتجديه دائم السؤال عن اهلك واهله والزملاء والاصدقاء

طبعا يهمنا من كل العلاقات دي اهلك واهله
حضرتك ممكن تخصصي يوم اسبوعي لكل طرف وتتناوبي الذهاب لهم واستقبالهم وحاولي ماتجمعيش الطرفين غير في اضيق نطاق يعني المناسبات فقط


حاولي تعملي تقارب بين الجيل الجديد في اسرتك واسرته زي اختك واخته او اخوكي واخوه الاصغر منكم
وإستغلى تلك الشخصيه فى الإستمتاع بالخروج معه من وقت لآخر



اما الزوج المنغلق حتلاقيه يحب يرجع البيت يقفل بابه ويعمل اجتماع يومي بحضرتك والاولاد (ان وجد)مش عاوز اطراف تانيه

ده للتعايش معاه نخلي استقبالنا لضيوفنا في حدود اقل طبعا وزياراتك للاهل حتكون فرديه في معظم الاحيان ودوره حينحصر انه ييجي ياخدكم بالليل كمان زياراتك الفرديه لاهله حتكون بادرة جميله منك


المهم إنك تتفهمى رغبته وتتأقلمى معها ولا تفاجئيه بعزومه أو زيارة أو تجمع عائلى وتكون النتيجة ...
وأحرصى على أن تقومى بالواجبات الإجتماعيه دون أن تشغليه بها سواء لأهلك أو لأهله

وفى كل الأحوال سواء منغلق سواء منفتح دى مش مميزات ولا عيوب دى صفات مطلوب منك التعامل معها كما هى وتتكيفى معها لأنها مش هاتتغير


الزوج العملى والزوج العاطفى
الزوج العملى دا طبعا بيكون ممل إلى حد ما عايش حياته بالورقه والقلم وبيخطط لكل صغيره وكبيره
وتلاقيه بيفكر فى مشكلات مستقبليه ويبدأ يحط إحتمالات وحلول كأنها حصلت فعلا
من الآخر عايزك تمشى على الخط وبالمسطره
أكبر مشاكله ميزانية البيت وإوعى يسمع منك جملة
سيبها بالبركه
تبقى مصيبه ويوم مش فايت
دا بقى عيشى معاه الدور وتفاعلى معاه وخليكى مراقباه من بعيد عشان تلحقيه قبل المركب ما تغرق
لأن التجارب أثبتت إنه فى النهايه هايفشل فى التخطيط


أما الزوج العاطفى فدا عايش لسه الحلم الوردى ومريييييح
بيديكى كل اللى معاه وإتصرفى إنتى يا روحى
المشكله إنه بيبقى متخيل إن عش العصفوره يقضينا وعنده يقين إن فلوسه دى توفرلك حياة ولا حياة ساويرس وهم من الآخر مايجبوش كيلو لحمة
النوع ده لااازم تتعاملى معاه بحكمه وتكونى قادره على التخطيط الجيد وإدارة زمام الأمور دون أن تشعريه بالتقصير
ولكن
من وقت لآخر لازم تشركيه معاكى شويه عشان يفوق من الوهم
إتحججى بأى حاجه وخليه هو يجيب طلبات البيت مره عشان يحس بتطور الأسعار
أو خديه معاكى السوبر ماركت بحجة إن الطلبات كتير مش هاتقدرى تشيليها لوحدك
المهم تحاولى تخليه إيجابى شويه معاكى ويخرج من الغيبوبه


وفى النهايه وفى كل الأحوال زى ما قولنا دى لا هى مميزات ولا عيوب دى صفات لازم تتعاملى معاها زى ماهى


إنتهى الدرس وأتمنى تستفيدوا منه وتعرفوا تطبقوه فى باقى الصفات

الحصة الخامسة
إضحكى خللى الدنيا تضحكلك...كيف تحافظين على سعادتك مع زوجك


كيفكم حبيباتى يارب بخير وسعاده
ساعات كتييير وأنا ماشيه فى الشارع أو موجوده فى أى تجمع نسائى أجد نفسى أتامل وجوه المتزوجات والأمهات
وماشاااااااء الله
هو وش واحد زى ما يكون قالب ومتركب على كل الوجوه
نظرة منكسرة تحمل الكثير من الإحباط
حاجبين يقتربان من بعضهما كما لو كانوا واحد مش إتنين
والفم ممدود للأمام فى عبوس غريب
من الآخر
صوره متجسده للمعاناه والإنسانيه المعذبه

وياسلام لو الفم ده إتفتح
تسمعى أحلى درر
عن قلة النوم والتعب والشقى ليل نهار
وشغل البيت والراجل اللى مش بيقدر
والعيال ودوشتهم
والعيشه واللى عايشنها

طبعا فى الحاله دى لاااا أتعجب أن أرى الزوج يمشى مهرولا تاركا مسافه لا تقل عن 100 متر بينه وبين خالته تفيده
أقصد زوجته

أو يجرى يوصلها لأى مكان ويتركها بالساعات ثم يعود ليصطحبها على موعد النوم
ويحمد ربنا لو نامت فى العربيه عشان مايسمعش كلمتين من العيار التقيل



طيب حضرتك تعبانه وقرفانه من العيال وتربيتهم ودوشتهم
غريب الدار اللى راجع بعد القرف والمواصلات وروتين الشغل
يدخل يلاقى كائن مجسد للنكد فى وجهه........ لييييييييييييييييه

تعبانه قرفانه مهما كان إحتفظى بابتسامتك
مش خساره فى الراجل اللى تعبان عشانك
إعتبريها صدقه والا زكاة عن عفيتك اللى راحت
ولما تحافظى على إبتسامتك وتدورى إزاى تسعدى نفسك بنفسك
هاتلاقى السعاده بتملى بيتك
دورى على الموضوعات السعيده وإتكلمى فيها بدل أحاديث الشكوى اليوميه
وبلاش تبقى تفيده ولا فتكات ولا عدلات
خليكى نانسى وهيفا وروبى كمان

يبقى ملخص حصتنا إييه


1- الإبتسامه تفتح لكى أبواب السعاده فى بيتك
2- تعلمى فن الحديث وتفننى فى إظهار رقتك ودلالك
3- إخلقى موضوعات مفرحة وبلاش الشكوى اليوميه
4- زى ماحضرتك تعبانه هو كمان شقيان خليكى مصدر راحته
5- سعادة بيتك تبدأ منك فاحرصى على إسعاد نفسك والنظر لما أنعم الله عليكى به




أى واحده تطبق الدرس كويس هاتلاقى جوزها رجع يمسك إيدها فى الشارع على ضمانتى
ربنا يديم عليكم السعادة والهنا
الحصة السادسة

كيف تتغلبين على الملل الزوجى؟
كااااااااااااااام مره دار حوار بينك وبين زوجك وشعرتى وكأنه حوار قديم مكرر سمعتيه عشرات المرات
نفس الكلمات
نفس التعبيرات
نفس التعليقات
وكأنها آلة مبرمجه تتولى الحوار بشكل آلى
تنظرين حولك بعد مرور سنوات وسنوات من رحلة زواجك تشعرين بكآبة تسيطر على نفسك
ليس كرها لحياتك ولا إعتراضا على شخص زوجك
الملل
وكأنه حبل يلتف حول رقبتك منذ سنوات دون أن تشعرى حتى يكاد يخنق أنفاسك
وتكون النتيجه غير مقبوله بالمره
عصبيه أغلب الأوقات
تنفعلين لأتفه الأسباب
تسيطر عليكى فكرة أنا كان مالى ومال الجواز
كنتى فين يا لآآآآآآآآ لما أنا قلت آآآآآآآآآآآآآآآآه
طيب قبل ما نقعد جنب بعض ونغنى ظلموه وفات الميعاد
نبدأ من الأول
دايما كل واحده فينا جواها إعتقاد يمكن نتيجة التربيه والنشأه إن مادام الزوجه قايمها بكل واجباتها تبقى زوجه ناجحه
وواجباتها المتعارف عليها دايما
نظافة بيتها
تجهيز الأكل ونظافة الملابس والكوى والمسح والترتيب وطبعا راحة جوزها وطلبات الأولاد
لكن
عمرك سألتى نفسك فين دورك كمتعه لزوجك
ألم يشرع الله عز وجل التمتع فى الحياة الزوجيه
ولا تقتصر المتعه على المعنى المتعارف عليه بالعلاقه الزوجيه فقط
لماذا لم تفكر أى منا فى كيفية إمتاع الزوج فى حياته اليوميه
هل تتخيلين مدى التجديد والبهجه التى ستغمر حياتك كلما بذلتى مجهودا فى التفكير لإيجاد وسائل للمتعه والسعاده فى حياتك
لماذا تتخوفين من تجربه الملابس المثيره الضيقه فى منزلك؟
لماذا تقلقين من تغيير لون شعرك وعمل نيولوك من آن لآخر؟
لماذا لا توفرين لنفسك يوما فى الشهر أنت وزوجك تخرجان فيه بدون أطفال تتذكرون أيام الماضى العتيق؟
لماذا لا تفاجئين زوجك بأفكار جميله ومبهجه لإستقباله ليلا بعد عناء يوم عمل طويل؟
لماذا ولماذا ولماذا.......
الأفكار لا تنتهى والعقل لن يعجز أبدا عن عن التفنن فى إيجاد وسائل أخرى
فلماذا لا تبدأى الآن
قبل أن يلتف هذا الحبل القاتل حول رقبتك وتجدين نفسك تغرقين فى بحر الملل الكئيب
يبقى ملخص حصتنا إيييه
1\ لا تستسلمى أبدا للشعور بالملل وحاولى دوما تجديد حياتك
2\ دورك كزوجه لا يقتصر على الواجبات المنزليه فقط هناك أدوار أخرى شرعها الله لكلا الزوجين
3\ لا تجعلى الخجل يمنعك من تنفيذ أفكار مثيره تمنح زوجك السعاده والرضا
4\ لا تخافى من تجربة أى فكرة جديده كونى جريئه فى قراراتك

الدرس السابع

تعلمى فن الشجاااار مع زوجك


طبعا هاتستغربوا من عنوان الحصة وهاتقولوا الست دى إتجننت
هاقولكم لا حبيباتى الشجار بين أى زوجين موجود رضينا أم لم نرضى مفيش حياة عسل وسكر على طووول الخط ومفيش برضه حياة بصل على طول الخط
حبه حلوه وحبه مره
ومهما حاولتى لااازم يتواجد خلاف لأنكم شخصين مش شخص واحد
يبقى لازم تعرفى حدودك فين عشان تتعاملى مع خلافاتكم بفن
تعالوا نعيش سيناريو أى إتنين متجوزين
في المرحلة الأولى من الزواج .. إذا حدث خلاف بسيط بينكم وإتفاجأتى بتصرف غير مقبول أو كلمة في غير محلها
اللى هايحصل إنك هاتبكي وتدخلى أوضتك وإنتى مقموصه وغضبانه
لكن فى نفس الوقت بتبقى مستنياه ييجى يصالحك وعندك إستعداد إنك تسامحيه مع أول كلمة
وتفضلى مستنيه
شويه
وييجى حبيب القلب بسرعه يراضيكى ويمسح الدمعتين
و تنتهي المشكلة


و تمر الأيام و تطول العشرة شويه
وطبعا يحصل خلاف جديد لكنه المره دى خلاف جوهري وأكبر من المره اللى قبله
وتلاقى حبيب القلب نبرة صوته بتعلا وهو بيعبر عن رأيه ويبدأ يحتد
فتقفى مذهولة إزاى يتكلم معايا بالطريقه دى

تغضبى وتقفلى باب أوضتك وإنتى مصرة المره دى على عدم قبول إعتذاره إزاى يهينى مش هاسمح بده أبدا
والمره دى كمان مش هاييجى بسرعه يراضيكى لاااااااا

هايخرج ويسيب البيت وبعد ما يهدا يرجع
ويحاول يراضيكى طبعا هاتتدللى شويه لكن فى النهايه بترجع المياه لمجاريها
لحد كدا كوييييس


وتمر سنوات.. و تذوب الفوارق بين الزوجين
فيحدث خلاف شديد توقعى هذا فالحياة لا تصفو دائما لكما
و إذا بالزوج يعبر عن رأيه و اعتراضه بأعلى صوت
ينتقدك .. ويبدأ فى إستخدام عبارات جارحة لأول مرة
تشعرين بالمرارة
فقد قالها صراحة .. جوازى بيكى كان غلطة
وهنا
تجدين صراعا يملأ أعماقك وأفكار تتضارب فى رأسك
تقفين مصدومه
يعنى أرد عليه بنفس إسلوبه
والا أسيبله البيت وأمشى
والا أزعل زى كل مره وأستناه يصالحنى
بكرم أخلاقك وحبه اللى مالى قلبك
هاتختارى
إنك ماتكلمهوش لمدة كام يوم لحد ما يبوس القدم ويبدى الندم
و يعتذرعن المصيبه اللى قالها
وصافى يا لبن
لحد هنا برضه
جمييييييييييييل



وتمر أيام وشهور بحلوها ومرها
وآآآآآه من الحياة وما تحمله لنا من منغصات
فيقع خلاف آخر
وهنا أصبح الصوت العالى والإنتقاد والعبارات الجارحة شىء عادى ماهو عدى الحاجز ده
فنلاقى الموضوع إتطور وممكن يبدأ فى إهانتك أو إستخدام السب لا سمح الله
وهنا كرامتك هاتثور
وطبعا هاتقولى لنفسك هو كل مره هاسكتله
لاااااااااااااااا
وتبدأى تعلى صوتك وتفكريه بالنعمه اللى هو فيها
وتبدأى تقللى من شأنه وتفتكريله كل النقط السودا اللى شوفتيها معاه
يتغاظ أكتر والمعركه تحمى
وممكن فى لحظة يخطى كل الحواجز ويتطاول بالضرب


يا نهاااااااار
للدرجه دى
ماهو عبارة عن سلم مجرد ما بتطلعى أول درجة بتلاقى نفسك درجة ورا درجة بتخطى كل الحدود

خلااااص لحد كدا
لااااااااااااااااااا
لسسسسسسسسسسه
*
*
*
مع الوقت هاتلاقى الراجل بيفقد إحترامه لزوجته وبيبصلها على إنها ند ليه فقدت أنوثتها فيصبح إسلوب الحوار المعتاد هو الكلام الجارح والتعليقات السخيفه


وهى أيضا تفقد خجلها وعذوبتها وتحرص أن يكون صوتها أعلى من صوته
آآآآآآآآآآه أمال إيه هاسكتله


وحاجز ورا حاجز ودرجه بعد درجة
بنلاقى العصفورين اللى دخلوالعش وهم بيغردوا
بقوا عبارة عن مصارعة ثيران
ويتحول العش الوردى
لساحة قتال
كل واحد بيفرد عضلاته ويتصيد الأخطاء للتانى


أين المودة؟؟
أين الرحمة؟؟
أين السكينة؟؟


والإجابة حبيباتى عند كلا الزوجين
لا تستسلما لبراثن الشيطان الذى يدخل بينكما ليكيد لكما
إنتبهى حبيبتى
لا تتخطى الحواجز ولا تصعدى درجات هذا السلم
تمسكى برقتك وأنوثتك وعذوبتك
حتى لو بدأ هو فى تخطى الحواجز
فحتما سيتراجع أمام كرم أخلاقك وحسن تبعلك
وأصلك الطيب


دعيه دوما يرى صورة تلك الفتاه التى سعى جاهدا للإرتباط بها
لا تدعى الحياة بمنغصاتها تتغلب عليكى وتأخذك فى دواماتها
واجهى دوما ثوراته بهدوء وإمتصى غضبه بكلمات حانيه


والمره دى هاقول كلمه كمان للأزواج
ياريت يقروها
الرجوله ليست بالعصبيه وثورات الغضب والصوت العالى
تأكد أن حنانك عليها وإحتوائك لها وتفهمك لشخصيتها سيجعلها أسيره لك
تسعى بكل طاقتها لرضاك



متعكم الله جميعا بالسعادة وراحة البال
وكفاكم الله شر الشجار

الحصة الثامنه
ياااااااااااااا مرحب بالحباااااايب يا مرحب

كام مره تعرضتى لهذا الموقف الظريف اللطيف فى حياتك
تجلسين فى أمان الله يرن جرس الباب وإذا بأهل زوجك أمامك يأتون زائرين لبيت إبنهم
أو أحد أقارب زوجك كان مارا بالقرب منكم فخطرت فى باله أن يمر عليكم
مش مهم بيمر إمتى
ميعاد غدا
ميعاد نوم
بدرى متأخر
المهم إنك المفروض تكونى دوما فى أهبة الإستعداد لإستقبال كل من يخطر فى باله زيارتكم من باب الود المتأصل فى العائله
طبعا دى مش دعوه منى لقطع الأرحام والعياذ بالله ولا أن تتصف علاقتك بأهل الزوج بالتجهم والكآبه عند زيارتهم لكى
ولكن
هل صلة الرحم والود والحب يبيح عكس ما ينص عليه شرع الله عز وجل والمنهج الذى وضعه لكل عباده
يقول المولى عز وجل فى كتابه الكريم فى سورة النور
(يَا أَيُّهَا الَّذِينَ آمَنُوا لَا تَدْخُلُوا بُيُوتاً غَيْرَ بُيُوتِكُمْ حَتَّى تَسْتَأْنِسُوا وَتُسَلِّمُوا عَلَى أَهْلِهَا ) (27)
والآيه لا تحتاج لشرح ولا توضيح بكل بساطه لا تدخلوا بيوتاً ولا تزوروا أحداً حتى تستأذنوا من صاحبها وتأخذوا منه الموافقة

فإذا كان صاحب البيت موجود ومستأنس أو مستعد لاستقبالكم فأدخلوا بيته وإذا لا فاختاروا يوماً آخر

وليس معنى أن تطلبى بوضوح من أى أحد يود زيارتك إبلاغك قبلها تليفونيا أنك تفرضين رسميات لا تليق بروح الود والمحبة
إن هذا الموقف الذى كثيرا ما يتكرر فى بيوتنا يخلق العديد من المشاكل ويكون سببا فى الخلاف والزعل بين الزوجين
فالزوجه مهما كانت تحب أهل زوجها وتحترمهم فإن البيوت لها حرمات
ونخص الزوجه بالتحديد لأنها كسيده لهذا البيت عليها أن تكون مستعده لإستقبال ضيوفها من عدة نواحى
من ترتيب المنزل وتجهيز واجب الضيافه وتجهيز الملبس الذى ستقابل به زوارها
وكل تلك الأمور لا تمثل أى مشكله للرجل بعكس سيدة المنزل التى تشعر بهجوم غير متوقع عليها لم تحسب حسابه
ولهذا على كل رجل أن يكون متفهما تماما لتلك النقطه وعلى كل زوجه أن تكون واضحة منذ البداية على لفت نظر الزوج على أهمية تلك النقطة بالنسبة لها
وبهذا نتجنب الكثير والكثير من المشاحنات التى سنتجنبها لو نظرنا فقط لديننا وكلمات المولى عز وجل بتدبر
مرحبا بالحبايب فى أى وقت ولكن الذى يناسبنى
مرحبا بالحبايب فى أى وقت ولكن بعد إتصال هاتفى لن يكلف الكثير
ولأننا دوما نقول ما لنا وما علينا
عاملى الناس بمثل ما تحبى أن يعاملوكى به
فلا تتطفلى أنتى أيضا فى أى وقت بالزيارة على أى حد قبل إستئذانه
ولو إعتذر عن إستقبالك فى هذا اليوم لأى سبب تقبلى هذا بصدر رحب وأعلمى أن لكل إنسان ظروفه ولكل بيت مشاغله الخاصه

يبقى ملخص حصتنا النهارده إيييييه

1- كونى واضحة ومحددة فى تنظيم حياتك من أول يوم وضعى قواعد واضحة يحترمها الجميع

2 - إكسبى زوجك بلفت نظره للأمور من وجهة نظر الدين وكلمات المولى عز وجل التى هى منهاج كل مسلم

3- روح الود والمحبة لا تعنى إقتحام البيوت فى أى وقت مهما كانت درجة القرابة

4 - عاملى الناس بمثل ما تحبى أن يعاملوكى فلا تفرضى نفسك فى أى وقت على أى أحد

أدام الله عليكم السعادة وراحة البال
وأتمنى أن تكون حصتنا قد نالت رضاكم

0 comments:

Related Posts Plugin for WordPress, Blogger...